गणतन्त्र सिध्याउने षड्यन्त्र भएकाले नयाँ गठबन्धन: प्रचण्ड

असार ३१, २०७३ नेकपा माओवादी केन्द्रका अध्यक्ष पुष्पकमल दाहालले राष्ट्रियताको आडमा मुलुकलाई प्रतिगमनतर्फ लैजाने षड्यन्त्र भएकाले आफ्नो पार्टीले नेपाली कंग्रेससँग गठबन्धन बनाएको बताउनुभएको छ । काठमाडौंमा आज सञ्चारकर्मीसँग कुरा गर्दै दाहालले प्रधानमन्त्री ओलीले गणतन्त्र, संघीयता र धर्म निरपेक्षताविरुद्धसँग लगन गाँठो कस्दै गएकाले बाध्य भएर नयाँ सरकार बनाउनु परेको दावी गर्नुभयो । उहाँले भन्नुभयो– राष्ट्रियताको आडमा मुलुकलाई प्रतिगमनतर्फ लैजाने डिजाइन भएको छ, नक्कली राष्ट्रवादले मुलुकको हित नगर्ने भएकाले नयाँ गठबन्धन बनाउनुपरेको हो । दाहालले आफूहरुले उठाएको सहमतिको मुद्धालाई वेवास्ता गरेर प्रधानमन्त्री ओलीले अहंकार देखाएको टिप्पणी समेत गर्नुभयो । उहाँले आन्तरिक एकता सृदृढ नभएसम्म राष्ट्रिय स्वाधिनता कायम नहुने भन्दै मधेस समस्या समाधान अपरिहार्य भएको बताउनुभयो । दाहालले भन्नुभयो–सीमित समुदायको पक्षपोषण गर्ने र अरुलाई दमन गर्ने नीतिले मुलुकको हित गर्दैन । अर्को प्रसंगमा दाहालले कंग्रेस र माओवादी केन्द्रवीचको गठबन्धनलाई उत्तरी छिमेकी चीनले समेत समर्थन जनाएको बताउनुभयो । आफ्नो नेतृत्व बन्ने सरकारले चीनसँग भएका व्यापारिक सम्झौतालाई कार्यन्वयन गर्ने बताउनुभयो । दाहालले भन्नुभयो– मेरो पहलमा नै चीनसँग व्यापारिक सम्झौता भएको हो, अब कार्यन्वयन पनि गरिनेछ, जसरी अहिले बाहिर प्रचार भएको छ, त्यस्तो कदापी होइन । संविधान कार्यन्वयन, मधेस समस्या समाधान, भूकम्पपछिको पुनर्निर्माण आफूहरुको प्राथमिकता हुने दाहालको भनाइ थियो ।